please asl please asl ပလုံပလုံနှင့် တူတူတူ ဂျီတော့ အရူပ်ထုတ်များ

အခု တလော ဂျီးမေလ်း ချက်လိုင်းမှာ ထူးထူး ခြားခြား ကြုံလာ ရတာက တော့ ကျွန်မ မရင်းနှီး တဲ့ နံမည်တွေက ရုတ်တရုတ် ပလုံ ပလုံဆို ရေးကြိး သုတ်ပြာ တက်လာပြီး Please asl Please asl ဆိုပြီး အမော တကော လျှာခလုတ် တိုက်မတတ် အငမ်းမရ မေးလာကြပါတယ် ကျွန်မလဲ သူတို့ ဘာမေးမှန်း ရုတ်တရုတ် မသိပါဘူး နောက်မှာ ပိန်းလိုက်တာ ဆိုပြီး အထာနဲ့ a ဆိုတာ age s ဆိုတာ Sex l ဆိုတာ locationကို ဆိုလိုပါသတဲ့ ပေါက်တီး ပေါက်ရှာလေး တွေပါ ဘာလုပ်ဖို့ သူတို့က တစ်ဘက်လူရဲ့ အသက် လိင် နေရာကို မေးရသလဲ ဆိုတာတော့ ကျွန်မ အခုထိ သေသေ ချာချာ မသိသေးပါဘူး အခုဆိုရင် တွေ့တာနဲ့ အသက် ဘယ်လောက် ဆိုတာ မရမက နွားပိန် တွယ်ပြီး ခြေကန် ပြီးကို စစ်မေးကြပါတယ်.ပြီးရင် တစ်ယောက်တည်း လား ဘယ်သူနဲ့နေလဲ စသဖြင့် ထောက်လှမ်းရေး စစ် စပ်စုတတ်ကြပါသေးတယ် တတ်နိုင် ရင်တော့ ကျွန်မနံမည် အရင်းက ဘာ ဘယ်နေရာမှာ ရှိနေပြီး ဘာအလုပ်လုပ် သလဲဆိုတာကို ပြောပြလေ့ရှိပါတယ် အများစုကတော့ သူငယ်ချင်း မိတ်ဆွေအဖြစ် လက်ခံ စကားပြော ဆွေးနွေးလို့ရပြီး အချို့ ယောက်ကျားမှန်း မသိ မိန်းမမှန်းမသိ ချက်ထဲက မိတ်ဆွေတွေ ကတော့ ဘာမှန်းမသိ ရုတ်တရက် ရန်သူ ဖြစ်သွား တတ်ပါတယ်..အချို့ဆို မြန်မာလူမျိုးဆိုတာ ယုံနိုင်ဖွယ် မ၇ှိအောင်ကို မိုက်မိုက် ရိုင်းရိုင်း ပြောဆို ဆက်ဆံ သွားသူ တွေရှိပါတယ်..အဲ့လူတွေကိုတော့ စကားကို ဆက် ပြောမနေပဲ တစ်ခါ တည်း ပြည်ဝင်ခွင့် ပိတ်လိုက် ပါတယ် ဇွဲကြီးသူ တစ်ယောက် ကတော့ မဖွယ်မရာ ပြောလာလို့ မင်းအမေနဲ့ မင်းညီမလေးကို သွားပြောကွယ် ငါတော့ မအားသေးဘူး ဆိုပြီး ချက်ကနေ ဘလော့ လိုက်တော့ မေးလ်ကနေ လာဆဲပါသေးတယ် မလျော့သော ဇွဲလုံ့လ အပြည့်နဲ့ပါ သူပြောတဲ့ စကားထဲမှာ ထူးခြား တာက နင်တို့လို ကိုယ်တိုင်းပြည် အကြောင်း မကောင်းပြောရမှ ထမင်း စားရမယ့် မိန်းမတွေကို စိတ်ကူး ထဲတောင် မထည့်ဘူးဆိုပဲ

မှတ်မှတ် ရရ G mail ဆိုတဲ့ မေးလ်ကို စသုံး တတ် ခဲ့တာ လွန်ခဲ့တဲ့ ၂၀၀၅ ခုနှစ် က မှပါ အဲ့တုန်း ကမှ အင်တာနက် ဆိုတာ ကို နဖူးတွေ့ ဒူးတွေ့ စသိ ခဲ့တာ ဖြစ်ပါတယ်။ အရင်က Yahoo mail တစ်ခုပဲ သိလို့ yahoo mail ကိုပဲ မေလ်း ထင်ခဲ့ တာပါ..ဂျီမေးလ် ကို စ မိတ်ဆက် ပေးခဲ့တာ ဇင်းမယ်ြ့မို့ စာနယ်ဇင်း သင်တန်း ကျောင်းက ကွန်ပျူတာ လက်တွေ့ အသုံးချ နည်းကို အချိန်ပိုင်း လာ သင်ပေး ခဲ့တဲ့ အစ်မ မွန်မွန်ပါ..အဲ့ဒီ့နေ့က သူက ဂျီမေလ်း အားသာ ချက်တွေကို ပြောပြပြီး ကျွန်မတို့ အားလုံးကို သူ့ မေးလ် က တဆင့် တစ်ပြိုင်နက် ဂျီမေးလ် အကောင့် ဖွင့်ပေးခဲ့ ပါတယ်..ကျွန်မက ဂျီမေးလ် ဖွင့်မယ် ဆိုတော့ ပထမဆုံး မေးလ် နံမည်ကို စဉ်းစားပါတယ် နဖူးကြောကို တွန့် လက်ဆစ်နဲ့ ခုံစောင်းကိုတတောက် တောက် ခေါက်ရင်း အကြီးအကျယ်ကို စဉ်းစားခန်း ဖွင့်မိလို့ ညနေစာ နောက်ကျသွားမိပြီး ဟင်းကိုယ်တာ မကျန် အောင်ကို ဖြစ်ခဲ့ရပါတယ်။ ထူးထူး ဆန်းဆန်းလေး ဖြစ်အောင် moonဆိုတာက ကျွန်မ လက်ရှိ နံမည် honey ဆိုတာကတော့ ကျွန်မကို ချစ်သူက ခေါ်တဲ့နံမည် koko ဆိုတာ ကတော့ အရင် ရည်းစား နံမည် အားလုံး ပေါင်းပြီး မွန်းဟန်နီကိုကိုလို့ ပေး လိုက် ပါတယ်။ အဲ့ ကတည်းက စသုံးခဲ့တဲ့ ဂျီမေးလ် ဖြစ်နေလို့ အရင် သူငယ်ချင်း ဟောင်းတွေ ရော သူငယ်ချင်းသစ် တွေရော နောက် သိလာတဲ့ မိတ်ဆွေ တွေ အများစု က မေးလ် စာရင်း ထဲမှာ ရှိနေလို့ အဲ့ဒီ့ sexy name ဖြစ်နေတဲ့ မေးလ်လေးကိုပဲ တစ်ခုတ် တရ အခု ထက်ထိ သုံးနေဆဲဖြစ်ပါတယ် တစ်ချိုကလဲ မေးလ် နံမည်ကို က ပြီတီတီနဲ့ မို့ ယောကျာ်း ထင်ပြီး အီစီကလီ လုပ်တဲ့သူ လဲ ကြုံဖူး ပါတယ် လပျားကိုကို ဆိုပြီး အခြောက်ထင်ပြီး လာအီ နေတဲ့သူလဲ ကြုံဖူးပါရဲ့ ဒါပေမယ့် အားလုံးကို ရယ်စရာလိုပဲ သဘောထား ခဲ့ပါတယ်

စသုံး ဖြစ်တဲ့ အချိန် ၂၀၀၅ ကစပြီး ၂၀၀၈ နှစ်ဆန်း ပိုင်းအထိ ကျွန်မ ဘ၀မှာ ကျွန်မ စပြီး ဘလော့ block လိုက်တဲ့ ချက် ရန်သူတွေ အင်မတန် ကို နည်းပါးပါတယ်။ စကားပြော အတော့်ကို အဆင်မပြေ ဖြစ်လာလွန်းလို့ ပထမဆုံး မှတ်မှတ်ရရ လူ တစ်ယောက် ကို စဘလော့ လိုက်တယ်။။ အင်မတန် စကားများ ပြသနာရှာ ယောက်ျားလေး တန်မဲ့ ပစိပစပ် များလွန်းပြီး ဟိုဘက် စကား ဒီဘက် သယ် ဒီဘက် စကား ဟိုဘက်ပို့ အတင်း တွေချည်းပဲ ဆက်တိုက် ပြောကျင့် ရှိတဲ့ သူ့ကို စကား လာပြောတိုင်း တော်တော် လေးကို အော်ဂလီဆန် ရွံရှာစိတ်ဖြစ်လာလို့ စိတ်သက်သာ ရအောင် ဘလော့လိုက်တာပါ. မပြောချင်ပဲ listထဲမှာ မြင် နေ ရတဲ့ သူကို မမြင်ရတော့ တော်တော် ကို စိတ် ချမ်းသာ သွားပါတယ်။

နောက် ဂျီတော့ထဲမှာ ကျွန်မ အမြဲ လုပ်လေ့ ရှိတဲ့ အကျင့်လေး တစ်ခုရှိပါတယ် ကျွန်မရဲ့ စိတ် ရာသီဥတု အခြေအနေကို G talk Status မှာ စာလေးတွေ အမြဲတင်ပြီး နေ့တိုင်း အချိန်တိုင်း ပြောင်းပြီး ပြောပြလေ့ ရှိပါတယ်. နောက် ကလေး ပုံလေးတွေ ရုပ်ပြောင်လေး တွေဆို အမြဲ တစ်လှည့်ဆီ တင်ထားလေ့ ရှိပါတယ်..ဒါကြောင့် ကျွန်မမှာ ပုံ ဆန်းဆန်း လေး စုတဲ့ အလေ့အထ ရှိပါတယ် မိတ်ဆွေ တော်တော် များများ ကလဲ ကျွန်မ ပုံလေးတွေ ကို ချစ်လို့ ဆိုပြီး မကြာခဏ တောင်းယူ လေ့ ရှိကြပါတယ် ကျွန်မကလဲ အမြဲ ပေးပါတယ် နောက် ကျွန်မ သဘောကျ တဲ့ ပုံလေးတွေ တွေ့ရင် သူများဆီက အမြဲ တောင်းယူ လေ့ရှိပါတယ်..

အဲ့မှာ ပြသနာတစ်ခုပေါ်တာက မြန်မာပြည်မှာ ဖွဲ့စည်းပုံအခြေခံဥပဒေ မူကြမ်း မဲဆနခံယူပွဲမှာ VOTE NO , NO VOTE တွေ လုပ်ကြ ပါတယ်. သူက မှန်တယ် သူက မှားတယ် ဘယ်လိုလုပ်သင့်တယ် စသဖြင့်ပြည်တွင်း ပြည်ပအစုံ ထင်မြင်ယူဆချက် အမျိုးမျိုးနဲ့ ကြေငြာချက် တွေ ထုတ်ပြီး ပြောကြ ဆွေးနွေးကြ လုပ်ကြပါတယ်။ ပြီးတော့ နီးစပ်ရာ မိတ်ဆွေအချင်းချင်းလဲ နင်ဘာလဲ ငါဘာလဲ မေးကြပါတယ်..

အဲ့တာနဲ့ ကျွန်မလဲ ကျွန်မယူဆချက်နဲ့ ကျွန်မ ဂျီတော့ စာတမ်းလေးမှာ..NO VOTE လို့ တင်ထား လိုက်ပါ တယ်.. အဲ့မှာ ပြသနာက စတော့တာပဲ ချက်ကနေ အမျိုမျိုး ဝေဖန်ကြတော့တာပါပဲ..ဟေ့ Vote No ဖြစ်ရမှာလေ မင်းမှားမယ် တစ်ယောက် ကလဲ အေး မင်းမှန်တယ် NO VOTE ပေါ့ ကျွန်မကတော့ အားလုံးကို အပြုံး သင်္ကေတလေး :) နဲ့ပဲ ရယ်ရယ်ပြ လိုက်တယ်..အဲ့မှာ ဆိုးဆိုးဝါးဝါး ကိုယ်နဲ့လဲ သိတာ ကြာပြီဖြစ်တဲ့ မိတ်ဆွေ တစ်ယောက်က ဘလိုင်းကြီး ချက်ပေါ်ကနေ မင်းက မဲမပေးဘူး ဆိုတော့ နအဖ အားပေး လုပ်တာလားတဲ့ မင်း မဲတစ်မဲက စစ်တပ် အတွက် ပေးလုပ်ချင်တာလား စသဖြင့် စကားလုံး အကြီးကြီးတွေနဲ့ ဆက်တိုက် ပစ်ခတ် တိုက်ခိုက် လာပါတော့တယ် ကျွန်မဘက်ကလဲ စကတည်းက နဂိုကတည်းက ဘယ်သူကမှ အသိအမှတ် မပြုတဲ့ လုပ်ရပ် တစ်ခု အတွက် ပြီးခါနီးကျခါမှ သဘောတူလား မတူဘူးလား လာပြီး အခုမှ ကလေး အဖေ ဖော်တဲ့ ကိတ်စ ၀င်ကို မပါဘူး လို့ ဆုံးဖြတ် ထားပြီး သူတို့ပွဲမှာ မပတ်သတ် ချင်လို့ ကင်းကင်း နေပြီး မဲကို တမင်ကို သွားမပေး ခဲ့တာပါ..နောက်ဆုံးတော့လည်း အာဏာကိုင်တွေက လုပ်ချင် တိုင်း လုပ်သွားကြတာပဲ မဟုတ်ပေလား ဒါပေမယ့် အခုလို ဘလိုင်းကြီး NO VOTE လုပ်ရုံနဲ့ နအဖ အားပေးဆိုပြီး နံမည်လာတပ်တဲ့ သူ့ရဲ့ သိမ်ဖျင်းလွန်းတဲ့ စိတ်ဓာတ် ကို စက်ဆုပ် ရွံ့ရှာ လွန်းလို့ လုံးဝကို ဘလော့လိုက်ပါတယ် အဲ့လိုလူတွေအပြင် ဂျီတော့ စာတမ်းလေးမှာ အားရက်တွေမှာ လာနေကျ အိမ်က မိသားစု ကို မျော်နေကြောင်း ရေးမိလို့ နင်လုပ်ထားတဲ့ အမူ နင်ခံလေ နင် ပိုက်ဆံ လိုချင်လို့ အပြင် ထွက်လာတာ မဟုတ်လား ငွေလိုချင် နင့်မိသားစု စွန့်ရမှာပဲ စသဖြင့် ဘယ်တုန်းက နာနေမှန်းမသိတဲ စိတ်တွေနဲ့ကို ဘလိုင်းကြီး ဆဲဆို သွားသူ တွေလည်း ကြုံဖူးပါတယ်

နောက်တစ်ခု ကတော့ ကျွန်မ မေးလ်လေးကို လာအတ် add တဲ့သူတွေဆို အကုန် လက်ခံလေ့ ရှိပါတယ် ကျွန်မ မေးလ် လိပ်စာကို ကျွန်မ သူငယ်ချင်းတွေက တဆင့် ကွဲကွာနေတဲ့ သူငယ်ချင်းတွေလဲ ဖြစ်စေ အလုပ်ကိတ်စ ကြောင့် ဖြစ်စေ လာအတ် တာလဲ ဖြစ်နိုင်တယ် နောက်ပြီး မိတ်ဆွေ အပေါင်းအသင်း ဖြစ်ချင်လို့ လာအတ်တာလဲ ဖြစ်နိုင်လို့ အမြဲ accept လုပ်ပြီး လက်ခံလေ့ ရှိပါတယ်။ တခါတလေ ကျွန်မကို လာနုတ်ဆက်ရင် ရုတ်တရက် ဘယ်သူ ဆိုတာ သတိမရလို့ မေးလ်ကိုပြေးပြီး recent conversation ကနေ ပြန် စစ်ကြည့်ပြီး အမြဲ လေးလေး စားစား စကားပြော လေ့ရှိပါတယ်. အဲ့မှာ ပိုဆိုးတာက ချက်ကနေ တစ်ခါ တစ်လေ မလိုအပ်ပဲ အရည်မရ အဖတ်မရ ပြောတတ် သူတွေလဲ တွေ့ရတတ်ပါတယ်. စိတ်လိုလက်ရ ဖြစ်ရင်ဖြစ်စေ အလုပ်အား နေရင်ဖြစ်စေ ပြန်ပြောလေ့ ရှိပေမယ့် အခု အလုပ်က ပိုက်ဆံ ဘယ်လောက် ရသနည်း ဘယ်လို အစား အသောက် တွေ ကြိုက်သနည်း ဘယ်လို အ၀တ်အထည်တွေ ၀တ်လေ့ရှိသနည်း ဘယ်ရေမွှေးတံဆိပ်သုံးသနည်း ရေအိမ်က ဘိုထိုင် ကမုတ်လော ငုတ်တုတ်ထိုင်လော အိမ်ကို ငွေဘယ်လောက် ပို့နိုင်သနည်း မိသားစုက ဘယ်မှာနေသနည်း ဘာတွေကို အားလပ်ချိန်တွေမှာ ဘယ်လိုနေလို့ ဘယ်လို စားသောက် နေထိုင် သနည်း စသဖြင့် လာလည် လို့ ရမည်လော အိမ်ထောင် ၇ှိသလား ရည်းစားရှိလား စသဖြင့် မေးမြန်း စုံစမ်း စစ်ဆေးလေ့  ရှိတာတွေ အတွက်တော့ နည်းနည်း စိတ် အနှောင့်အယှက် ဖြစ်ရပါတယ်။

အဲ့နောက်ပိုင်းမှာတော့ ချက်တင်ပေါ်ကနေ ကျွန်မရဲ့ ကိုယ်ပိုင် ဂျီမေးလ်လေးကို လာပြီး ရန်စနည်းမျိုးစုံနဲ့ ကျူးကျော် ရန်စ စကားလုံး ပေါင်းစုံကို လက်နတ်ဆွဲကိုင် တိုက်ခိုက်တဲ့လူ မဖွယ်မရာ ပြောသူ ရန်စသူ စော်ကားသူ မှန်သမျကို အပြီးအပိုင် နယ်နှင်ဒဏ် ပေးလိုက်ပြီး ပြည်ဝင်ခွင့်တွေ ဆက်တိုက်ပိတ် ဖြစ်ပါတယ်..

အများအားဖြင့် ကျွန်မက ဂျီမေးလ် ချက်ကို ဖွင့်ထားပါတယ် တစ်ရက်မှာ ၂၅နာရီ ဖွင့်ထားပါတယ် ဖွင့် ထားရတဲ့ အကြောင်းရင်း ကတော့ မြန်မာပြည် က ကျွန်မ မိသားစုနဲ့ မိတ်ဆွေတွေအတွက်ပါ ကျွန်မ အလုပ်ကိတ်စ ကြောင့် ဖြစ်စေ မိသားစု ကိတ်စ ကြောင့်ဖြစ်စေ လာပြော သူတွေနဲ့ အချိန် ခြားပြီး ဆက်တိုက် လာလေ့ရှိတဲ့ သူငယ်ချင်း တွေ အတွက် လူရှိသည်ဖြစ်စေ လူမရှိ သည် ဖြစ်စေ ဖွင့်ပေး ထားပါတယ် ကျွန်မ ဘက်ကို ရိုက်လိုက်လို့ ပြန် မတက် လာရင်လဲ ပြောလိုတဲ့ အကြောင်းလေးတွေ မတ်ဆေ့ လေးတွေ ချန်ခဲ့ပေးလေ့ရှိပါတယ်။

အဲ့ဒီမှာလည်း ကျွန်မကို အမြဲရန်လာစတတ်တဲ့ သူတွေ ရှိပါတယ် သူတို့ ပြောတတ်တာကတော့ ကျွန်မကို အမြဲ အွန်လိုင်းမှာ ချည်းပဲ တွေ့နေရတာပဲ ဘာဖြစ်လို့ အွန်လိုင်းမှာ တစ်နေကုန် ရှိနေသနည်း တခြား အလုပ်မရှိဘူးလား စသဖြင့် အရိုးခံ မဟုတ်တဲ့ စိတ်တွေနဲ့ မေးမြန်း စုံစမ်း ရန်စလေ့ရှိကြပါတယ်။ ကျွန်မက ပြန်တုံ့ပြန် လေ့ရှိတာကတော့ ကျွန်မကို အမြဲ အွန်လိုင်း တွေ့သူ သည် သူသည်လဲပဲ အွန်လိုင်းတွင် ကျွန်မ ကဲ့သို့ အချိန် ပြည့် ရှိနေသဖြင့် ကျွန်မကို မြင် နေရခြင်း ဖြစ်သည်ဟု ပြန်ပြော လိုက်တဲ့ အခါ တို့က အလုပ်ချိန်ပဲ သုံးတာ အစ်မကို အမြဲတွေ့နေရလို့ မေးတာဆိုပြီး ကန်တန်တန် ပြန်ဖြေသွားလေ့ရှိပါတယ် ဒါတွေဟာ တကယ်တော့ မလိုအပ်ပဲ သူများကိတ်စကို လာရောက် ဝေဖန်ပြောဆိုခြင်းဖြစ်ပါသည် ထိုသို့ မေးသူများ အားလုံးနီးပါးသည် ကျွန်မ ငြိမ်နေရင် မနေနိုင်မထိုင်နိုင် ကျွန်မကဘက်က ဘယ်တော့မှ စကားမစပဲ သူတို့ကပဲ အရင် စပြီး လာလာ စကားပြောသူတွေသာ ဖြစ်ကြပါတယ် စကားပြန်မပြောနိုင်ရင်လဲ မင်းတို့ပဲ အလုပ်များ ချင် ဟန်ဆောင် နေတာလား နင်တို့ တွေက အဲ့တာပဲေ-ာက်လုပ်ရူပ်ချင်ဟန်ဆောင်နေတာ စသဖြင့် ဆဲဆို သွားလေ့ ရှိပါသေးတယ်

နောက် တစ်ခုက ကျွန်မ သိပ် နားမလည် တဲ့ Burglish တွေ နဲ့ လာချက် တဲ့အခါ ကျွန်မ အင် မတန်ကို စိတ်ညစ် ပါတယ်။ ကျွန်မ ချက်တင် တက်စက ၂၀၀၅ခုနှစ်ဖြစ်ပြီး အင်တာနက်ဆိုတာသုံးခဲ့တာမှာ အခုသူတို့ အချင်းချင်း ဆက်သွယ်တဲ့ တီထွင် ထားတဲ့ မြန်မာ အင်္ဂလိပ် ပေါင်းထားတဲ့ ကိုယ်ပိုင် အသုံးအနူံး လေးတွေကို တကယ့်ကို မရင်းနှီးခဲ့လို့ ကျွန်မ ကြိုးစားပြီး ဖတ်ပါ သေးတယ် သူတို့ ရေး ထားလေး တွေကို တကယ့်ကို နား မလည်နိုင် အောင် ဖြစ်ရပါတယ် သူတို့ကို ပထမ တောင်းပန် ပါတယ် တကယ့်ကို ဘာပြောမှန်း ကျွန်မ မသိ လို့ပါ လို့ နောက်ပြီး မြန်မာလို ဇော်ဂျီနဲ့ ရိုက်ပြောပါ ဒါမှမဟုတ်လဲ English လို ရိုက်ပေးပါလို့ ပြောပေမယ့် တစ်ချို့ကျ တော့လည်း ဆက်ကို သုံးနေဆဲဖြစ်ပါတယ်.အထူးသဖြင့် ပြည်တွင်းက ကလေး တွေနဲ့ စကား ပြောရင် အမြဲကြုံ ရတတ်ပါတယ်..အခုနောက်ပိုင်းတော့ သူတို့ပြောနေတာ နည်းနည်း နားလည်သလိုဖြစ်နေပါပြီ ဒါတောင် တစ်ချို့ စကားလုံးတွေ လွဲနေပါသေးတယ်..

နောက်ထပ် အဆိုးဝါးတကာ့ အဆိုးဝါးဆုံး ကျွန်မ စိတ် အနှောင့်အယှက် အဖြစ်ဆုံး ကိတ်စတစ်ခု ဂျီမေးလ်ချက်မှာ ဖြစ်လေ့ ရှိပါတယ် အဲ့ တာကတော့ ဆိုင်းမဆင့် ဗုံမဆင့် မပြောမဆို ရုတ်တရက် ကသုတ် ကရက် တူတူတူ ဟူ တူတူ တူတူတူ ဆိုပြီး အသံနဲ အလန့် တကြား ခေါ်တာပါ အလုပ်တွင် ခိုးချက်နေသူတွေ အသံပိုင်းဆိုင်ရာ တစ်စုံတစ်ခု အလုပ်လုပ် နေသူတွေအတွက် အကြီး အကျယ်ကို ပြသနာတက်နိုင်တဲ့ အလိုက်ကမ်းဆိုး မသိမူ ဖြစ်ပါတယ်။ ကြိုတင် ခွင့်တောင်းခြင်း မရှိပဲ ရုတ်တရက် အသံနဲ့ ခေါ်တဲ့ ကိတ်စဟာ အရမ်း ကိုလဲ ရိုင်းပျတဲ့ အမူလို့ ထင်မိပါတယ် callingကို ignore လုပ်သည့်တိုင်အောင် အကြိမ်ကြိမ် မလျော့သော ဇွဲလုံ့လ အပြည့်နဲ့ ထပ်ခါ တလဲလဲ နှိပ်နိုင်သူတွေကို လဲ တော်တော်လေးကို အံသြမိသလို အဲ့လို ခေါ်တဲ့သူတွေကို တော်တော် ကြီး ကိုလဲ စိတ်ဆိုးမိပါတယ် အများအားဖြင့် ကျွန်မက အသံဖိုင်တွေကို အမြဲ တည်းဖြတ် နေရလေ့ ရှိတဲ့အတွက် ပြသနာ အကြီး အကျယ် တက်လေ့ရှိပါတယ် အခုတော့ invisible လုပ်တတ်ပြီမို့ အလုပ်ရူပ်ချိန် တိတ်တိတ်လေး ပုန်းအောင်း နေတတ်ပါပြီ..ဒါပေမယ့် အဲ့တာလို ပုန်းနေတာကိုလဲ ကျွန်မ တော်တော်လေးကို မကြိုက်ပါဘူး ဘာဖြစ်လို့လဲ ဆိုတော့ ရုတ်တရက် ပေါ်လာပြီး စကားပြောသူတွေကိုလဲ ကျွန်မ သိပ်ကြည့်မရ ပါ..ဘာကြောင့်ရယ် တော့ မသိ ပုန်းရာက ထွက်လာပြီး ငါကွ ငါကွလို့ ပြောသယောင် ယောင် ကျင့်ဝတ်နဲ့ မညီသလို ခံစားရပါတယ်

အမှန်တော့ ဂျီတော့တွင် ယဉ်ကျေးမူ ရှိသည်ဟု ထင်ပါတယ် စိမ်းပြီး available ဖြစ်နေ သည့်တိုင် ကိုယ် ချက်ကြည့် လို့မှ ကိုယ့်ကို ပြန်မချက် နိုင်ရင် မအားဟု ယူဆသင့်ပါတယ် အချိန် တစ်ခုပေးပြီး စောင့်ဆိုင်း သင့်ပါတယ် ၀ါနေရင်တော့ ဖွင့်ထား ရက်နဲ့ အနားတွင် မရှိဟု သတ်မှတ်သင့်ပါတယ် သိပ်အရေးကြီးရင်သာ ချက်ကနေ တစ်စုံတစ်ခု ရိုက်ထည့်သင့်ပါတယ် နီနေရင် တော့ busy နေတဲ့အတွက် လုံးဝကို မနှောင့်ယှက်သင့်ဘူးဟု ထင်ပါတယ်။ မဖြစ်မနေ အသံနဲ့ စကား ပြောကို ပြောမှ ဖြစ်မယ် ဆိုရင် မပြောမဆို ဆိုင်းထ တီးမယ့် အစား အကောင်းဆုံးကတော့ အရင်ဆုံးကိုယ့်ကို လက်ခံစကားပြောမယ့်သူ ချက်မိတ်ဆွေကို ခွင့်တောင်းသင့်ပါတယ် ..

အဲ့တာဆိုရင် please please asl တွေအစား အရင်ဆုံး ဒီမေးလ်ကို ဘယ်ကရတယ် သူက ဘယ်သူဖြစ်နိုင်တယ် ဘယ်လို လူမျိုးဆိုတာ ယဉ်ကျေးမူရှိရှိနဲ့ မိတ်ဆက်စကား စတင် ရင်းနီးပြီးမှ လိုသလို မေးမြန်း သင့်ပါတယ် နောက် မအားပါဘူး ဆိုနေမှ ပလုံ ပလုံ ပလုံတွေအစား are u there ဆိုတဲ့ ပလုံတစ်လုံးတည်း တက်လာပေးမယ်ဆိုရင် တူတူ တူတူတူ တူတွေ မစခင် ကျေးဇူးပြုပြီး စကားပြောလို့ရမလားရှင် ခင်ဗျာ ဆိုတဲ့ ပလုံလေး တစ်ချက် အရင် တက်သင့်တယ် လို့ ထင်မိပါ ကြောင်း..ဂျီမေးလ် သုံးနှစ် သက်တမ်းတွင်းက အတွေ့အကြုံတွေပေါ် နားလည်မိတဲ့ ကိုယ်ပိုင်ခံစားချက်လေးတွေ ကို သူငယ်ချင်းတွေကို ရင်ဖွင့်လိုက်ရပါတယ်. နေရာတကျလေးပေါ့

10 Comments:

ခင်မင်းဇော် said...

ဟုတ်တယ်။ နီထားရက်နဲ့ အတင်းတတုံတုံတက်နေတာ ခက်တယ်။ အန်တီဆိုလဲ ဗွီဒီယိုအက်ဒစ်လုပ်ရင်း ရပ်ရပ်သွားရော။ မပြောမဆို ခေါ်တာလဲ မုန်းတယ်။ ကိုယ့်ကို လာအတ်ပြီး ဘယ်သူလဲမေးတာကို ဂျစ်ကန်ကန်ဖြေသူကလဲ ရှိသေး။ ဒါနဲ့ပဲ ခု လိုင်းပေါ်မှာ ဘလော့ပစ်တာတွေ များလာတော့တယ်။ ထောက်ခံတယ်။
ကိုယ့်အလုပ်ကလဲ အမြဲဖွင့်ထားရတဲ့ အလုပ်ကိုး။ ဒီလိုအနှောက်အယှက်ကတော့ ရှိမယ်ထင်တာပဲ။

ပီကေ said...

ဂျီတော့နဲ့ ပတ်သက်တဲ့ ခံစားချက်ကတော့ ကျနော်နဲ့ ထပ်တူပဲဗျာ။ တကယ်လို့ အသစ်ဝင်လာတဲ့ လူက ASL pls လို့ ပြောလာရင် Aung Soe Lin လို့ ကျနော် ပြောချပစ်လိုက်တယ်။ ပြီး ဆက်ကို မပြောတော့ဘူး။ ;P

Anonymous said...

မှန်လိုက်တာ မဆုမွန်ရေ၊ အွန်လိုင်းစည်းကမ်းလေးကို လူတွေက နဲနဲလေးနားလည်ဂရုစိုက်ကြရင်ကောင်းပါ့ဗျာ၊
ကျနော်လည်း ခဏခဏ ကြုံရလွန်းလို့ အဲဒီလိုလူမျိုးတွေကို တွေ့ရတာ တော်တော်စိတ်ပျက်ဖို့ကောင်းတယ်၊ နောက်တခုက ကိုယ့်အမည်နဲ့ ဗိုင်းရပ်ပို့တာတွေလည်းရှိလို့
ကိုယ့်မေးလ်passwordတွေကို ခဏခဏပြောင်းပေးနိုင်မှ တော်ရုံကြမယ်နော်။

Andy said...

တစ်ခုတော့ရှိသဗျ... ဒီမှာတချို့က အနီရောဂါထနေကြတယ်... နီရက်ကြီးနဲ့ ကျွတ်စီကျွတ်စီပြောနေလိုက်ကြတာ...

နောက်ဘာမှန်းမသိပဲ MIRC ချက်လိုလိုဘာလိုလို အကြောင်လာလာရိုက်တဲ့ ငနဲတွေလဲရှိသေးတယ်... အများကြီးပဲဗျို့... ဒီကြားထဲ ကုလားမကလဲ ဝင်ခုသေးနော် ဟဲဟဲဟဲ

ဖိုးဂျယ် said...

ထောက်ခံပါတယ်။ ထောက်ခံပါတယ်။ asl အတင်း မေးပြီး ယောင်္ကျားလေးဆို ဆက်မပြောကြပဲ
ကျတော့်ကို block လိုက်ပါတယ်။
တခါတခါကျတော့ စလုံးမှာ ကျောင်းတက်နေပါတယ်ဆိုတာ
ဟုတ်လားဘာလား ညာလားနဲ့ ဒါကြောင့်
"စလုံးမှာ ကျောင်းတက်နေသည်ဟု လိမ်ပြီး မြန်မာပြည်တွင် စပယ်ယာလိုက်နေခြင်းသာဖြစ်သည်။" လို့ရေးထားလိုက်တယ်။
မဆုမွန်လဲသိပါတယ်။ ကျတော်မေးလ် addressက
မိန်းကလေးနည်းနည်းဆန်တယ်လေ။

လွမ်းသုရင် said...

same feeling sis :P

အိပ်မက်နိဒါန်း said...

ဟုတ်တယ် အစ်မရေ..ကိုယ်က Burglish ကိုနားမလည်လို့ ဘာပြောတာလဲလို့မေးမိတာ တုံးလှချည်လား၊ဒါလေးတောင်မသိဘူးလားလို့ ပြောသွားတယ်. ကိုဖိုးဂျယ်ပြောသလိုမျိုး စလုံးမှာကျောင်းတက်နေတာလား.ငါတော့ မယုံဘူးဆိုတာလည်းပါသေးတယ်.icon မှာကိုယ့်ပုံလေးတင်မိရင်လည်း ဓါတ်ပုံပို့ပေးပါဆိုတာပါသေး..

Anonymous said...

အနော်ကတော့ ပုံးကိုနေတာအေးရော ဟုတ်
တယ်ဗျ တချို့ကောင်မလေးတွေ ရည်းစားစကား လာလာပြောနေကြလို့ဗျာ စိတ်
ညစ်တယ်တကယ်ပဲ နောက်ပိုင်းတော့ ပုန်းကိုနေ
ရတယ်ဗျာ။

Anonymous said...

ချတ်တင်ကြောင့် စိတ်ညစ်နေကြလား?
http://www.galwaysidle.com/download.html
ဒီလင့်လေးသွင်းထား ကိုယ်နဲ့အမြဲတစေ ဆက်သွယ်မဲ့ ရင်နှီးသူတွေကိုတော့ ဘယ်အချိန်ကွန်ပြူတာ အပေါ်မှာ ရှိမယ် ဆိုတဲ့ အကြောင်း အသိပေးထားလိုက်ပေါ့။ ချမ်းမြေ့ကြပါစေ...။

အိုးဝေအောင် said...

honey ဆိုတာကတော့ ချစ်သူက ခေါ်တဲ့နံမည်...?
koko ဆိုတာ ကတော့ အရင် ရည်းစား နံမည်..?